Taliwala sa paglugway sa General Community quarantine sa lalawigan sa Zamboanga del Norte ilawum sa E.O. No. 20-31, kun ang hiniusang gabayan sa probinsiya sa pagpatuman sa GCQ, ang katawhan sa dakbayan sa Dipolog ug mga establisyemento, anaa na sa kadalanan ug mibalik sa mga naandam.
Ubay-ubay na usab ang mga katindahanan nga wala pa tuguti sa gabayan nga obalik pag-abli, nagpadayon na ilang pagpaninda, lakip na ang mga trabaho sa ilang mga empleyado, diin wala na kini nahasubay sa panawagan sa pangagamhanang magpundo sa tagsa-tagsang panimalay aron batukan ang makamatay nga Covid-19.
Matud pa sa sector sa mga ginagmay nga mga negosyante sa lalawigan nga mibalik na sila sa pag-abli sa ilang mga negosyo gumikan kay gihimo nilang sumbanan ang pamahayag ni Gov. Roberto Uy nga “stable” ang dagan sa panginabuhi sa mga katawhan ning lalawigan gumikan way natalang kaso nga nagpositibo sa Covid-19 sa Zamboanga del Norte.
Bisan pa man niini, duna gihapoy pipila ka mga katawhang naningala ug nahibulong ug nganong gitugutan ang mga katawhang maglaruy na usab sa kadalanan, lakip na ang mga senior citizens ug mga kabatan-unan nga ilawom pa gihapon sa 24-hour curfew.
