Gipaklaro karon sa kagamhanang probinsyal sa Zamboanga del Norte pinaagi sa Provincial Tourism Office nga ang mamahimong makuha dinhi mao lamang ang “Goods Pass” dili ang “Quarantine Pass”.
Kini ang gipaklaro ni Atty Goldie Love Gonzales-Poculan, ang OIC sa Provincial Tourism Office human daghan mahidangat sa maong buhatan aron sa pagpangayo ug quarantine pass.
Gipasabot ni Atty. Gonzales nga ang “Goods Pass” maoy ihatag ngadto sa mga establismento nga anaa dinhi sa Zamboanga del Norte nga adunay negosyo sa essential goods, supplies, cargoes nga mobyahe gawas sa probinsya ug aron usab sila makabalik dinhi.
Ang “goods pass” ihatag lamang ngadto sa kwalipikadong driver ug pahinante sa establismento kinsa mag-deliver sa goods gawas sa probisnya nga pinirmahan ni Governor Roberto Uy ug adunay selyo sa probinsya sa Zamboanga del Norte.
Ang mga rekisitos aron makakuha sa goods pass sa Provincial Tourism Office mao ang business permit, list of delivery trucks nga giprimahan sa tag-iya, Official Receipt ug Certificate of Registration sa Delivery Trucks, listahan sa driver ug pahinante pinirmahan sa tag-iya nga nakabutang ang ngalan, designation, edad, address ug contact number, identification card sa driver ug pahinante na adunay ngalan ug prima sa likod niini, proof of previous delivery gawas sa probinsya sa matag delivery truck.
Usa lamang ka representante sa matag establismento ang mopasa sa maong rekisitos ngadto sa Provincial tourism Office nga anaa nahimutang sa Capitol Building, Estaka ning dakbayan sa Dipolog, 8:00am-6:00 pm, Lunes hangtud Huwebes.
