Cagayan de Oro – Bisan pa man sa matag adlaw nga pagpahinumdum sa mga miyembro sa Night Market Management Committee (NMMC) ngadto sa mga ambulant ug sidewalk vendors sa Cogon Market area, apan daghan gihapon ang padayon nga nagmagahi sa pagsunod sa mga palisiya ug balaod sa syudad nga gipatuman sa administrasyon ni Mayor Rolando `Klarex’ Uy.
Kini ang hinungdan nga ubay-ubay sa mga ambulant ug sidewalk vendors ang nakuhaan sa ilang mga paninda pinaagi sa mga sakop sa Road and Sidewalk Clearing Unit (RaSCU) sa Roads and Traffic Administration (RTA) atol sa ilang pag-monitor ug paglibot sa nagkadaiyang area sa Cogon market.
Gipadayag ni kanhi Kag. Enrico Salcedo, co-chairman sa Night Market Management Committee, nga wala nagkulang ang Team sa paghangyo ug pagpahinumdum sa mga ambulant ug sidewalk vendors kalabot sa mga palisiya ug ordinansa sa syudad nga angay nilang sundon.
Anaa usab ang paghatag og gamay nga kaluag isip pagsabot sa ilang panginabuhi apan pipila sa mga vendors ang milapas sa mga balaod hinungdan nga mapugos ang RaSCU pagkuha sa mga paninda ug gi-turnover ngadto sa buhatan sa City Social Welfare.
Nunot niini, naglaum si Salcedo nga sundon na sa ubang ambulant ug sidewalk vendors ang mga palisiya ug balaod sa syudad aron dili maperhuwesiyo ang ilang panginabuhi.
News and photo courtesy of CIO CDO
