Total de 35 dependiente de droga el ta esta ahora bajo el programa de reformacion na Balay Silangan Reformation Center (BSRC) na municipio de R.T. Lim, Zamboanga Sibugay.
El programa de reformacion ya principia del Martes cuando el gobierno municipal del R.T. Lim ya inagura con el BSRC que ta reinforsa con el campaña contra droga ilegal en aquel municipio.
El oficina regional del Philippine Drug Enforcement Agency (PDEA) ya habla cay aquellos quien bajo el programa de rehabilitacion ya identifica el gobierno municipal del R.T. Lim.
Si Maharani Gadaoni-Tosoc, el director regional del PDEA quien ya atende con el inaguracion del BSRC, ya comenda con el gobierno municipal del R.T. Lim cay finalmente ya establisa ya sila de ila particular BSRC.
Durante el inaguracion, si Tosoc ya explica con el mga visita presente el descripcion general del BSRC, el significancia y el operacion del facilidad.
Asegun con Tosoc, el BSRC es parte integrante del programa del limpieza de drogas na barangay.
El objeto del facilidad amo para reforma con mga delincuentes de drogas por medio de retificar de ila atitud y comportamiento, de este modo hace canila mas productivo y ciudadanos respetuosos de ley.
(B. Garcia, photo courtesy of PDEA-9)
