CAGAYAN DE ORO CITY- Gipasalig sa National Bureau of Investigation o NBI nga ilang sutaon ang paggamit sa bodega nga iya sa Gaisano sa produksyon ug distribution sa minilyong kantidad sa mga buhis nga mga sigarilyo. Kini tapos nakonspiskar sa mga ahente sa NBI ang moabot P882 milyones nga balor sa mga sigarilyo sa duha ka higayon nilang pagronda sa barangay Bayabas ug Cugman ning dakbayan niadtong Martes.
Matud pa ni Atty. Jonaidah Darimbang sa legal department sa NBI nga ang bodega sa Cugman, iya sa Gaisano. Si NBI Director for Northern Mindanao Patricio Bernales nag-ingon nga dili kini unang higayon nga ang bodega sa Gaisano, gigamit sa illegal nga kalihokan. Kahinumduman nga niadtong 2015, ang mga ahente sa narcotics mironda na usab sa bodega sa Gaisano sa Zone 6, Bigaan, Barangay Cugman gumikan sa alegasyon nga kini gigamit isip ang laboratory.
Gibutyag sa NBI nga ang mga nakonpiskar nga mga sigarilyo gihimo nga illegal nga way klaro nga government stamps. Dili pa usab piho kon asa nagagikan ang maong mga sigarilyo.
Pipila ka brands nga gigamit sa mga counterfeiters mao ang Jackpot, Bravo, Marvels, Astro, Two Moon, YS Filter ug RED.
Ang mga violations niini sumala sa otorida mao ang unlawful possession of articles subject to excise tax without payment of tax ug unlawful possession of spurious internal revenue stamps.
Ang gihimong pagraid sa maong bodega nahimo tapos usa ka informant ang mihatag tip sa NBI. Matud pa ni Atty. Darimbang ang excise tax deficiency sa tres mil ka kahon sa sigarilyo nga nasakmit sa bodega sa Bayabas moabot sa P562.5 milyones pesos samtanga sa Cugman warehouse nga 1,707 boxes, moabot sa P320 Milyones ang excise tax deficiency.
Si Dir. Bernales sa NBI nag-ingon nga kon dili matumbok ang grupo nga responsible sa maong illegal nga kalihokan, ang gobieno mahimong makagukod sa tag-iya sa mga bodega.