Malampusong gipahigayon ang National Children’s Month Kick-off Program uban sa temang: “Sama-samang Itaguyod ang Karapatan ng Bawat Bata sa Panahon ng Pandemya!” didto sa Orchid Pavilion, Plaza Magsaysay ning dakbayan, kagahapon, Nobyembre 3, 2020 sa may alas- 8:30 ang takna diin gipahigayon kini pinaagisa Livestream didto sa Dipolog City Government Facebook Page.
Gitambongan ang maong kalihokan ni Dipolog City Mayor Darel Dexter T. Uy uban nilang Vice Mayor Horacio B. Velasco, Sangguniang Kabataan Federation President Mandel Zoe B. Lugasan ug City Social Welfare Officer, Ms. Arlene O. Jatico.
Dakong pasalamat ang gipa-ambit sa Welcome Message ni Dipolog City Federation of Children’s Association Vice President, Mr. Rebelito S. Remulta sa malampusong pagpahigayon ning maong kalihokan ilabina usab sa suporta gikan sa Lokal nga kagamhanan ning dakbayan.
Mapasalamaton nga gipa-ambit sa mayor sa iyang mensahe nga bisan pa sa panahon sa pandemya, nagpdayong malampuson ang maong kalihokan nga nagsaulog sa mga bata ug kabatan-onan.
Dugang pa niini, mapasalamaton usab siya sa mga nitambong sa maong kalihokan lakip na ang mga kalampusan nga nakab-ot sa dakbayan sa Dipolog isip usa ka “Child-Friendly City” sa atong nasud pinaagi sa ilang tabang ug suporta.
Matud pa ni Mayor Uy, dinali-an nga lihok ang gikinahanglan aron mapanalipdan ang mga bata ug kabatan-onan sa hulga sa pandemya pinaagi sa pahimo’g mga lakang nga mamahimong luwas sila sa maong sakit. Dugang pa niini, usa kini ka pribilehiyo ug responsibilidad isip mga lideres nga mahimong matuman kini.
Nag-awhag usab si Hon. Lugasan sa iyang mensahe sa importansya sa pagsunod sa mga health protocols alang sa kaayohan sa panglawas sa mga katawhan lakip na ang mga bata ug kabatan-onan.
Nagpahimundum usab siya sa pagbansay ug pagdisiplina sa mga bata ingon nga mamahimong mga alagad sa Ginoo.
Nagpresentar usab sa maong kalihokan ug intermission number ang mga kabataan sa Dipolog City Drop-in Center for Children nga gisundan sa panumpa sa “Panatang Makabata” nga gipangulohan ni Ma. Chareyst Estaño.
Natapos ang maong kalihokan sa pag-anunsyo ni Ms. Jatico sa mga nagkalain-laing aktibidades nga ipahigayon karung bulana nga may kalabutan sa National Children’s Month 2020.
(City Information Office-jnp)