Umabot iti sangaribu innem a gasut pitopulo ket siam dagiti iskolar ti probinsia nga umawat iti stipendda para iti daytoy maikadua a semestre.
Segun ken ni Dr. Dany Daquioag, education consultant ti gobierno probinsial karaman ditoy dagiti immawat ti stipendda ita nga aldaw manipud iti ili a Pagudpud, Adams, Bangui, Dumalneg, Burgos ken Pasuquin.
Nupay kasta, inpakaammo ni Mrs. Carolyn Juan Agcaoili ti Provincial Education Office a dagiti iskolar ti Doctor of Medicine ket aggigiddan to ti panagawatda intono malem no Biyernes iti Mariano Marcos State University.
Maipalagip a sangapulo ket dua dagiti kaunaan nga iskolar ti probinsia iti Doctor of Medicine a mismo pay a ni Gob. Matthew Marcos Manotoc ti nangiyammo kadakuada iti Sang. Panlalawigan.
Maibilang ditoy dagiti lima a taga siudad ti Laoag, tallo ti ili a Paoay saggaysa ti ili a Bacarra, Vintar, Pasuquin ken Banna Kabayatanna, kadagupan dagiti ili ken siudad ditoy probinsia ket kaaddoan ti iskolar manipud ti ili a Dingras nga addaan ti sanga gasut siam a pulo ket innem nga iskolar, sumarsaruno ti ili a San Nicolas nga addaan ti sangaa gasut tallopulo ken maikatlo a kaaddoan ti ili a Solsona nga addaan ti sanga gasut duapulo ket siam nga iskolar.
Naammoan a dagiti sumaruno nga umawat ti stipendda intono bigat ket ti ili a Solsona, Piddig, Sarrat ken Vintar. (Rosita Macalipis, RPN DZRL Batac Correspondent)
(Source: Provincial Government of Ilocos Norte)