Manamnama a manayunanti duapulo ket lima a milyon a pisos ti mailatang a budget para iti ‘’Buy Back Program’’ a pagbibinnuligan ti Gobierno Probinsial ken ti National Food Authority wenno NFA.
Segun kenni Sang. Panlalawigan Member Domingo Ambrosio, chairman ti Committee on Agriculture, nailanad daytoy iti mailunglungalong a pundo para iti Provincial Agriculture Office ken iti Sustainable Development Center.
Mamati ti bokal a makatulong daytoy tapno masolusionan ti maysa kadagiti kangrunaan a problema dagiti agmulmula ti pagay a kinalaka ti presio ti irik.
Malaksid iti daytoy, inlawlawagna nga agsipud ta panawen ti panagisagana ti ‘’budget’’ ket inbunannag ni Gob. Matthew Marcos Manotoc a suatanna dagiti mayor iti nadumaduma nga ili ken suidad ditoy probinsia tapno kiddawenna a tumulong dagitoy nga agsubsidize ket ad-adda a matulungan dagiti mannalon.
Kabayatanna, nagpadispensar daytoy kadagiti mannalon iti probinsia gapu ta saan a maguantaan ti gobierno probinsial ken ti NFA dagiti agdama a programa ti gobierno.
Innayonna daytoy ti rason a nakasentro ti panaggatang ti ahensia ti irik iti gunglo dagiti mannalon tapno maituding ti aldaw a panagturong dagiti pannakabagi ti NFA iti nadumaduma a paset ti probinsia.
(Ronald Domingo, RPN DZRL Batac)
(Source: Communications & Media Office | Provincial Government of Ilocos Norte)