Cebu City – Grand motorcade ang ipahigayon sa dakbayan sa Lapu-Lapu inay grand procession sa imahen sa Birhen sa Regla, ang milagrosang patron sa maong dakbayan, karong Nob. 20, bisperas sa pista.
Nahinabi sa media, si Cindi Chan, tsirman sa City Tourism Historical and Cultural Affairs, miingon nga gihulipan sa motorkada ang prosesyon tungod sa hulga sa pandemic.
Sa uwahing miting sa kagamhanang local ug sa kadagkoan sa simbahan nasabotan ang maong kausaban sa kabalaka nga mokatap og balik ang COVID-19.
Sa nasayran, ang ubang kalihokan alang sa pista nga gikanselar mao fluvial procession sa Nob. 12 ug ang Walk with Mary sa miaging adlaw diin napulo ra ka sakyanan ang gipaapil sa motorkada.
Suma pa ni Chan, napu lang ka sakyanan ang ilang gitugot nga mouban sa motorkada – upat sa simbahan ug unom sa siyudad lakip sa CDRRMO o City Disaster Risk Reduction Management Office.
Subay niini, matod ni Chan, ilang gidasig ang mga mulupyo nga maghuwat na lang nga moagi ang Birhen sa rota sa motorkada.
Iya usab giawhag ang mga deboto nga magbutang og altar ug magda og mga banderitas nga kolor puti ug asul sa daplin sa dalan nga maagian sa motorkada nga mahimo nilang iwarawara inig agi sa Birhen.
Ang rota sa motorkada sa Nob. 20 mao ang gikan sa simbahan paingon sa Brgy. Looc, Canjulao ug Babag, lahos sa Cordova; dayon sa Suba-Basbas, Marigondon, Maribago, Mactan, Ibo, Buaya, Pusok, ug Pajo dayon balik sa simbahan sa brgy. Poblacion.
(Jhon Tadlip/JTY, photo courtesy by Jhon Tadlip | RPN DYKC)
(Source: Lapu-Lapu City Provincial Information Office)
