Uban sa pakigtimbayayong sa National Government Agencies sama sa Department of Agriculture (DA), Department of Agrarian Reform (DAR), Department of Interior and Local Government (DILG) ug ang Department of Environment and Natural Resources (DENR) hingpit nga buksan sa panggamhanan sa Misamis Oriental ang Mt. Balatukan Range Cluster of Misamis Oriental Convergence Area Development Plan.
Kini ipahigayon sa Misamis Oriental Tourism Complex and Botanical Garden nga nahimutang taliwala sa lungsod sa Claveria ug siyudad sa Gingoog sa miaging adlaw.
Ang Mt. Balatukan Range adunay aggregate land area nga 228, 680. 41 hectares nga sakop ang munisipyo sa Balingasag, Balingoan, Binuangan, Claveria, Kinoguitan, Lagonglong, Magsaysay, Medina, Salay, Sugbongcogon, Talisayan ug ang siyudad sa Gingoog.
Napili isip usa sa 10 ka initial Local Convergence Agro-Enterprise Cluster pilot areas ang Mt. Balatukan Cluster sa National Convergence Initiative (NCI) alang sa Sustainable Rural Development pinaagi sa implementasyon sa environment-friendly enterprises ug livelihood opportunities.
Ang pagkamugna niining Mt. Balatukan Cluster CADP magsilbi nga framework alang sa pagkab-ot sa gipaninguha nga sustainable rural development hilabina ang natad sa eco-tourism ug agro-forestry nga nagkinahanglan og ecologically balanced mountain range nga pagadumala-an sa sakop nga komunidad pinaagi sa suporta sa lokal nga panggamhanan sa probinsya kauban ang mga stakeholders.
Naka-angkla sab kini sa Philippine Development Plan (PDP)/Ambisyon Natin 2040 ug duyog sa Sustainable Development Goals 2030 nga nagsilbing global framework kauban ang 8 ka haligi sa pagdumala sa lalawigan.
Ang probinsya sa Misamis Oriental ubos sa pamunoan ni Governor Bambi Emano nasayod nga ang pagpakgang sa kalisod maoy pinakadako nga hagit sa tibuok kalibutan.
Pinaagi sa pagtinabangay sa lokal nga pangamhanan, nasyonal nga ahensiya ug ang komunidad dako ang pagtu-o niini nga maprotektahan ang kinaiyahan nga maoy mosulbad sa kapobrehon nga giatubang karon sa kadaghanan. (Provincial Information Office – MisOr)