CAGAYAN DE ORO – Nagpaabot na lamang si Mayor Oscar Moreno sa Department of Health kon unsa ang ipagula nga kamanduan sa kasamtangang sitwasyon sa Cagayan de Oro labot sa hulga sa Covid-19. Apan iyang gipasabot nga ang solusyon niini anaa ra sa katawhan ilabi na ang pagsunod gayod sa gabayan sa gobierno.
Gipasabot ni Mayor Moreno nga kon adunay ipagula nga kamanduan ang DOH, andam kini sa pagsunod. Sa press conference nga gipahigayon gisugilon ni Dr. David Mendoza, ang assistant regional director sa DOH-10 nga kinahanglan nga ibase ang mga desisyon sa mga edidensya ug dili luagan ang mga lakang. Nasayran nga nagkadaghang Cagay-anons ang misinggit karon sa panawagan sa pagpailawom sa CDO sa enhanced community quarantine tapos laing tulo na usab ka mga positibo sa Covid-19 cases ang namatay. Apan ingon nga nagdumili pa ang mayor niini.
Sa kabahin sa DOH-10, sila miingon nga ila pa gipalawman ang ilang pag-analisar sa kasamtangang sitwasyon sa syudad aron sila makaduso sa rekomendasyon ngadto sa mayor.