Dili na moapela si Mayor Oscar Moreno kon ugaling lugwayan ang quarantine status sa Cagayan de Oro nga modified enhanced community quarantine kon MECQ.
Kini ang pamahayag ni Mayor Moreno atol sa daily presser human kutob lang unta karong adlawa Septiyembre 7 ang MECQ status sa syudad.
Nasayran subay sa bag-ong gianunsyo sa National Inter-Agency Task Force nga magapadayon pa ang MECQ status sa Cagayan de Oro sugod ugmang adlawa hangtud sa katapusan ning bulana.
Matud pa ni Mayor Moreno nga dili na siya moapela sa task force kon i-extend ang MECQ status sa syudad, sanglit taas pa gihapon ang healthcare utilization rate kon HCUR sa syudad.
Basi sa datos sa FASSTER Philippines, ‘high risk’ pa gihapon ang HCUR sa Cagayan de Oro nga mitala og 79.31 percent average HCUR as of September 2, 2021.
Ang HCUR nga naglangkob sa ICU bed, isolation bed ug mechanical ventilator maoy gahimoong basihan NIATF sa pagpagula og mga bag-ong klasipikasyon sa quarantine status sa usa ka lugar sa tibook nasud.
(Source: City Hall Daily Press Briefing)