CAGAYAN DE ORO CITY- Gipatuman sa kapitolyo ang strikto nga pagbiyahe pasulod ug pagpagawas sa Misamis Oriental tapos kini mipatuman sa province-wide community quarantine agig tubag sa panawagan sa inter-local government cooperation sa kapugngan pa ang pagkuyanap sa 2019 coronavirus.
Gimando ni Gobernador Bambi Emano ngadto sa otoridad nga strikto ang pagregulate sa travel flow ilabi na sa mga boundaries sa probinsya. Ang maong lakang gipatuman agig pagsanong sa panawagan sa Cagayan de Oro City government alang sa mga probinsya nga nagpalibot niini sa pagsuporta sa pagpatuman sa community quarantine.
Ang maong lakang nagdili sa basta-basta nga pagpasulod sa probinsya gawas kon kini adunay resonableng katuyuan. Sa pagkakaron adunay gipahimutang nga higpit nga checkpoint measures sa Lugait, Magsayasay, Eureka-Balason sa Gingoog City, Padiding sa Claveria, Bagocboc sa Opol ug sa Sta Ana sa Tagoloan haduol sa Malitbog, Bukidnon.
Ang mga exempted sa maong checkpoints mao kadtong nagdeliver sa pagkaon, fuel, medisina, livestock food, construction supplies ug uban pang basic commodities. Hinuon sila pangitaan sa clearances gikan sa barangay o mga document gikan sa ilang kampaniya. Ang curfew sa pikas bahin sa MisOr magsugod alas otso sa gabii hangtud alas singko sa buntag (8PM-5AM) matag adlaw.