GIANUNSYO ni Department of Interior and Local Government (DILG-10) Regional Director Arnel M. Agabe niadtong Enero 22, 2021 nga lakip ang lalawigan sa Misamis Oriental sa awardee isip “2019 National Anti-Drug Abuse Council (ADAC) Performance Award Implementation” gikan sa National Anti-Drug Abuse Council.
Tulo lamang ka probinsya sa Northern Mindanao ang nakaangkon sa pasidungog ug usa niini ang Misamis Oriental tungod sa sulundon nga mga paningkamot sa lalawigan aron madugangan ang mga lakang sa nasudnon nga gobyerno nga mapakgang ang problema sa ginadili nga druga sa nasod.
Nakakuha ang lalawigan og 96 porsiyento nga usa sa labing taas nga puntos.
Gipaabot ni Gobernador Bambi Emano ang iyang pasalamat sa National Anti-Drug Abuse Council tungod sa ilang pag-ila sa mga pagpaningkamot sa iyang administrasyon kauban ang Armed Forces of the Philippines (AFP), Philippine National Police, Misamis Oriental (PNP-MisOr) ug Philippine Drug Enforcement Agency – Misamis Oriental (PDEA-MisOr).
Gipasalig usab sa liderato niini nga dili magmaluya ug ang kampanya batok sa ginadili nga druga kinahanglan nga kanunay konektado sa iyang mga programa sa edukasyon, turismo labina sa kahusay ug kalinaw aron magpuyo ang katawhan sa lalawigan nga luwas batok sa druga ug layo sa ilegal nga mga kalihokan. (PIO-MisOr)