Cebu City- Gitakda na usab pahugtan og balik sa kagamhanang probinsiyal ang border restrictions sa lalawigan ug sa dakbayan sa Sugbo sugod sa Biyernes, Hunyo 26.
Tumong niini nga mapugngan ang nagsaka nga gidaghanon sa mga nataptan sa coronavirus disease o COVID-19.
Atol sa iyang regular presser, si Gob. Gwen Garcia miingon nga ipatuman sa probinsiya ang Section 8 sa Executive Order o EO no. 17 nga nagdili sa mga tawo gikan sa siyudad o sa dapit nga ubos sa ECQ o enhanced community quarantine pagsud sa hurisdiksyon sa lalawigan nga ubos sa GCQ o general community quarantine.
Sa nasayran, niadtong Hunyo 3 gipaubos ang Cebu City sa GCQ hinungdang gilugakan usab sa probinsiya ang restriction sa mga trabahante sa siyudad nga nagpuyo sa lalawigan.
Mahimo silang makapauli pinaagi sa pagpresentar lang sa company ID ug certificates of employment.
Apan sa pagbalik sa ECQ sa dakbayan, nakahukom ang Kapitolyo pagbalik sa estrikto nga restriction.
Tungod niini, gitataw ni Garcia nga anaa ra unya sa mga trabahante ang pagdesidir kon magpabilin ba sila sa dakbayan ug magpadayon pagtrabaho o mopauli na lang.
Gipasabot ni Garcia nga ila kining gihimo aron pagpanalipod sa mga tawo sa probinsiya.