Anaa ra sa Department of Health kun DOH ang paghukom kon i-ban ba o dili ang mga turista gikan sa China taliwa sa hulga sa 2019 novel coronavirus kun nCov.
Kini ang gipadayag sa director sa Department of Tourism kun DOT-7, Shalimar Hofer Tamano.
Nahinabi sa media, si Tamano miingon nga panawagan sa ban nag-agad sa pagbuot sa DOH sanglit ang 2019 nCov usa man ka public health concern.
Matod ni Tamano, hugot silang nakiglambigit sa DOH ug ilang giawhag ang tanang stakeholders paghimo sa ingon.
Alang niya, lisod kaayo kon daghan ang moisyo og advisory busa maayong isalig na lang kini sa DOH.
Ang DOT-7 apil sa gitakdang multi-agency meeting nga gipatawag sa Kapitolyo karong adlawa.
Sa sayo pa, miingon si Gob. Gwen Garcia nga ang tigum sa Huwebes molatid sa direksyon unsay buhaton sa probinsiya pag-alkontra sa 2019 nCov.
Samtang niadtong Martes si Lapulapu City Mayor Junard “Ahong” Chan miawhag sa DOH pag-ban sa tanang direct flights gikan sa silingang mga siyudad sa Wuhan, China paingon sa Mactan Cebu International Airport.
Sa kasamtangan, ang MCIA adunay 36 ka direct flights padung sa China matag semana.
Ang naasoyng mga biyahe direkta sa Guangzhou, Xiamen, Jinjiang, Chengdu, Shanghai, Shenzhen Nanjing, ug Hangzhou.