Cebu City – Gitakdang iapod-apod sa Department of Agrarian Reform o DAR7 ang 921 ka Cloas o certificate of land ownership awards ug EPs o emancipation patents alang sa 813 ka ektaryang yuta sa Cebu.
Una niini, nasakpan sa DAR ang 2,007 ka land titles nga alang sa 1,636 ka ektaryang luna nga gitagoan sa duha ka sako sa Cebu provincial office sa DAR.
Ang maong mga dokumento gilangkoban sa 1,620 ka Cloas ug 387 ka EPs nga adunay registration dates taliwa sa 1987 ug 2020.
Si DAR 7 Director Resty Osias miingon nga kadaghanan sa mga kabtangan nahimutang sa Daanbantayan, Aloguinsan, Sogod, Carmen ug Toledo City bisan kon ang undistributed land titles naglakip sa tanang bahin sa lalawigan.
Matod ni Osias, iyang gimandoan ang DAR Cebu provincial office nga sugdan ang pagpanghatag sa titulo sa mga benepisyaryo sa sunod semana.
Niadtong Lunes, gipasidan-an ni Kalihim John Castriciones ang 13 ka opisyal sa DAR Cebu nga mag-atubang og kasong criminal ug administratiba dihang hidiskobrehan ang duha ka sako nga gisudlan sa mga land titles nga wala maapod-apod sa mga nahitungdan. (Jhon Tadlip/JTY)
(Source: Department of Agrarian Reform 7, photos courtesy by MARPO lliza Toroy | MARPO Jenette Oporto)