Binigbig ni Gob. Matthew Marcos Manotoc ti dakkel nga epekto ti COVID-19 kadagiti kameng ti Jeepney Operator and Drivers Association wenno JODA bayat ti panangipaay ti probinsia ti tulong.
Inlawlawagna a sipud pay nangrugi ti nasao a problema ket kinnabinbinnuligna da Mr. Perry Martinez a consultant ti Provincial Economic Group ti probinsia ken ni Atty. Nikki Pilar a mangidadauloti Metro Ilocos Norte Council a mangkitkita ti wagas no kasano a maalay-layan ti epektona kadagiti operators ken drivers ditoy probinsia.
Nupay kasta, inannugot ti gobernador nga uray ania dagiti maar-aramid a tignay ket paspasig amin dagitoy nga apagapaman laeng a tulong.
Inbunannagna a ti ramut ti problema ket ti garaw dagiti tattao nga awan pay laeng unay ti rumrumruar ken agluglugan kadagiti pampasahero a lugan.
Mainaig iti daytoy, inpakaammona nga agibunong ti gobierno probinsial ti MINC cards a mangipaay ti medical insurance ken diskuento ti gatangen nga agas.
Malaksid iti daytoy, imbatadna a mangipaay pay ti probinsia ti gift certificate kadagiti kameng ti JODA maipud iti duapulo ket lima a rota ditoy probinsia.
Inpanamnama pay ti gobernador ti panangilalang ti probinsia ti baro a pundo a maipaay a “gas allowance” kadagiti maseknan.
Inannugotna a dakkel ti akem dagiti pampasahero a lugan ditoy probinsia gapu ta no awan dagitoy ket sigurado a marigatan ti sibubukel a probinsia.
Mainaig iti daytoy, impadanonna ti napalaus a panagyamanna kadagiti amin a driver ken operator dagiti pampasahero a lugan ditoy probinsia. (Ronald Domingo, RPN DZRL Batac Correspondent)
(Source: Provincial Government of Ilocos Norte)