Mapasalamaton si Mr. Bong Yadao, ang medical technologist ug nangulo sa Vector-Borne Disease Unit sa Sarangani Provincial Health Office, ngadto sa tanang partners sa Sulong Kalusugan program ni Governor Steve Chiongbian Solon, sama sa Tropical Disease Foundation, Global Fund, Pilipinas Shell Foundation, World Health Organization ug ang Notre Dame of Dadiangas University, tungod nagpabilin nga Malaria-free ang tibuok Sarangani Province sulod na sa pito (7) ka tuig.
Mapasalamaton usab kini sa Sangguniang Panlalawigan nila Vice Governor Elmer De Peralta ug tanang board member sa pagsuporta nga makapalit og mga maayong kagamitan pang-spray sa mga kemikal, sa saktong pag-training sa mga personahe, ug sa pag-organisa sa komunidad. Sa nakalabay nga tuig 2016, gideklara usab nga Filariasis-free ang probinsya sa Sarangani. Filariasis, balatian nga binitbit gihapon sa mga lamok, nga gapahupong sa mga panit ug parte sa lawas sa tao. Samtang, nagpabilin nga hulga ang pagtakod sa Coronavirus.
Naka-recover man niaging adlaw ang unom (6) ka mga indibidwal taga-lungsod sa Maitum apan nadugangan gihapon kini sa mga nag-positibo sa COVID-19. Baynte (20) na kabuok karon ang active case sa Maitum. Pito (7) ang active case sa Alabel, lima (5) sa Kiamba, nagpabiling duha (2) sa Malapatan, mao pud ang usa (1) sa Maasim. Ang Malungon ug Glan ang zero COVID sa gihapon karong panahuna.
Dili gyud magkumpyansa ang makunanayon nga pahimangno nila Governor Solon ug Senador Manny ug Congressman Ruel Pacquiao samtang ginahan-ay pa ang massive vaccination sa Pilipinas. Dili muila ang Coronavirus ma-Pasko man o New Year, maong padayon nga managana sa kaugalingon ug sa pamilya. (Provincial Information Office – Sarangani)