Giaresto sa mga personahe sa Del Carmen Municipal Police Station pinangunahan ni PCMS Arnold F. Salili ubos sa direktang superbisyon ni OIC PLt. Anglo Naldoza Ambid ang mga suspetsado sa kasong Alarm and Scandal ug Physical Injury dili pa lamang dugay didto sa Purok 3, Brgy. Tuboran, Del Carmen, Surigao del Norte human madawat ug girespondehan ang tawag ni Punong Barangay Fidel Gonzales.
Naila ang mga suspetsado nga mao sila ni;
1) JAYVE FORMILLES CONSIGNA, 23 anyos, single, wala’y trabaho;
2) ARIEL NENE GONZALES, 37 anyos, ulitawo, mag-uuma;
3) ASIS MELIDA ANTOLIN, 33 anyos, single, construction worker; ug
4) REGEN MARGARIO ARGENTE, 30 anyos, minyo, mag-uuma, mga lumulupyo sa Brgy. Maasin, Pilar, Surigao del Norte.
Nasayran sa gihimong inisyal nga imbestigasyon ngadto sa biktima nga mao si GENNY LISCANO CORNITA, 29 anyos, aduna’y katibo, wala’y trabaho ug lumulupyo sa Purok 3, Brgy. Tuboran, Del Carmen, nga samtang siya nagsakay sa de sidecar nga motorsiklo nga gimaniho sa iyang katibo nga mao si Putzolo Obligado gikan sa ilang umahan nga nanguha ug pangsugnod nga kahoy, ilang nalabyan ang grupo sa mga suspetsado sa tulay/creek sa Brgy. Tuboran nga nagdala ug mga empty bottles sa Tanduay ug gituohang ubos sa impluwensya sa ilimnong makahubog.
Usa sa mga suspetsado nga ginganlan ug Jayve Consigna ang milabay ug botelya ngadto sa biktima duha ka higayon sa wala’y igong rason hinungdan nga nasamad ang tuong tuhod sa biktima. Busa gipaspasan sa live-in partner sa biktima ang pagpadagan sa ilang motorsiklo paingon sa ilang pinuy-anan apan gigukod gihapon sila sa mga suspetsado nga nagdala ug mga kahoy ug bato. Nagsinggit-singgit ug nakigsagabay gawas sa pinuy-anan sa biktima ang mga suspetsado nga nakadisturbo sa lugar ug nanghagit ug away.
Giguba pa sa mga suspetsado ang kural nga kawayan sa pinuy-anan sa biktima samtang ang ubang mga suspetsado ang namuko ug bato nga gikaigo sa tuo nga tiil sa usa ka bystander nga mao si Dindo Obligado.
Taud-taud ang gibadlong sa mga mirespondeng opisyales sa barangay ang mga suspetsado apan gi-ignore lamang sila. Hinungdan nga gipang-aresto na ang mga suspetsado ug gidala sa Del Carmen MPS.
Atol sa komosyon, nakaangkon ug fracture sa tuo nga paa ang usa sa mga suspetsado nga mao si Regen Argente, ug girefer sa ospital sa dakbayan sa Surigao. (Jun Prex Salubre, Ronda 6 RPN DXKS)
