Nakasibat ang mga suspetsado sa illegal cockfighting didto sa Lobo Road, Brgy. 12, Poblacion, Dapa, Surigao del Norte niadtong Domingo, Hulyo 19 dihang girespondehan sa Dapa Municipal Police Station ang impormasyon nga gitawag sa nagpakabanang lumulupyo sa nasampit nga barangay mga alas 5:20 sa kahapunon.
Ang nagpasimuno sa maong ilegal nga aktibidad nga mao si JESSE ALESER ESPRA alyas Esboy, anaa sa hingkod ang pangidaron, ug lumulupyo sa Brgy. 13, Poblacion, Dapa ang gigukod usab sa Intel Officer nga mao si PSSg. Ricxes Forcadilla Mantilla apan wala na kini maabti pa gumikan sa katag-as ug kabaga sa kasagbutan.
Duha (2) sa mga kaubanan ni Mr. Espra ang nangailhan nga mao sila ni; alyas Pasak Formilles, lumulupyo sa Brgy. 13, Poblacion, Dapa; ug alyas Janjan Blase, lumulupyo sa Brgy. 10, Poblacion, Dapa.
Nakuha gikan sa cockfighting area ang tulo (3) ka fighting cock diin ang usa (1) buhi pa apan hilabihang samdan nga aduna pa’y nahibiling tari, ug gidala sa Dapa MPS alang sa dugang dokumentasyon ug disposal.
Mag-atubang sa kasong paglapas sa PD No. 449 ang mga nakasibat nga suspetsado.
(Jun Prex Salubre, Ronda 6 RPN DXKS)