Cebu City- Gihunong una sa mga shipping company ang pagpanawat og pasahero paingon ug gikan sa dakbayan sa Sugbo nunot sa direktiba sa DILG o Department of Interior & Local Government sa temporaryong pagsuspenso sa mga biyahe sa siyudad.
Segun sa managlahing advisory nga gi-post sa CPA o Cebu Port Authority, gianunsyo sa tagdumala sa Cokaliong Shipping Lines, Lite Shipping Corp., ug Medallion Transport, Inc. nga dili una sila motagad sa mga sumasakay sa dakbayan.
Sa ilang abiso nga gi-post sa gahapon sa kaadlawon, ang Medallion Transport miingon nga dili una sila mohatod sa mga pasahero sa siyudad agig sanong sa mando sa DILG.
Sa pikas bahin, ang Cokaliong Shipping miingon nga ang suspension sa ilang biyahe wala maglakip sa mga front-liners ug  uniformed personnel.
Gitataw sa Cokaliong nga ang trip gikan sa Nasipit, Agusan del Norte ngadto sa Jagna, Bohol ug balik ug ang  cargo trips sa tanang destinasyon nagpadayon.
Samtang sa usa ka advisory pinetsahan og Hunyo 19, gipahibawo sa DILG-7 ang temporaryong travel ban sa mga LSIs o  locally stranded individuals nga mogikan ug mopadung sa Cebu City, ang bugtong dapit sa nasod nga gipaubos sa ECQ o enhanced community quarantine (ECQ).
Ang Philippine Coast Guard o PCG District 7 miisyo usab og notisya sa mga mariner buyon sa travel ban.
Hinuon, si Commodore Joseph Badajos, commander sa PCG District 7, miklaro nga ang dis-og sa mga cargo vessel magpadayon.