Cebu City- Balik na sa GCQ o general community quarantine gikan sa MECQ o modified enhanced community quarantine ang dakbayan sa Talisay sugod karong adlawa, Hunyo 22.
Mao kini gitug-an ni Mayor Gerald Anthony Gullas gahapon sa hapon.
Matod ni Gullas, nakadawat na siyag resolution gikan sa Regional IATF o Inter-Agency Task Force nga nag-reclassify sa Talisay ngadto sa GCQ.
Subay niini, giawhag ni Gullas ang iyang mga constituents nga mopadayon pagtamod sa mga protocol aron paglikay sa Covid 19.
Sumala pa sa mayor, kinahanglang dili taligam-an ang pagsul-ob og facemask kon mogawas sa balay, tamdan ang social distancing policy, ug uban pa.
Sa nasayran, ang Talisay ang bugtong siyudad sa nasod nga gipailawom sa MECQ nunot sa rekomendasyon sa national IATF niadtong Hunyo 15.
Una niini, giabot og pagduda ang mga opisyal nga nasayop lang ang IATF sa pagbutang sa Talisay ubos sa MECQ tungod sa dili maong impormasyon labot sa recovery rate sa virus.
Si Gob. Gwendolyn Garcia miluwat og Executive Order o EO no. 17-E niadtong Huwebes nga nagmando pagus-os sa quarantine status sa Talisay ngadto sa GCQ sama sa probinsya.