Radio Philippines Network
DYKC Cebu News Provincial News

Mga Pinalusot Nga Sinakong Bugas Humay Nasakmit Sa Mga Sakop Sa Customs

Nasakpan sa mga sakop sa Bureau o Customs o BOC Port of Cebu ang halos tunga sa milyon ka pesos nga balor sa esmagol o pinalusot nga bugas humay sa usa sa mga pantalan sa dakbayan sa Sugbo.

Segun sa report sa BOC Cebu, gisuwayan pagpalusot sa Cebu ang  Myanmar White Rice pinaagi sa  shipment gikan sa Kaohsiung, Taiwan nga midunggo sa Sugbo niadtong Hulyo 23.

Ang ESS o Enforcement and Security Service, pinangulohan sa district commander nga si Jerry M. Arizabal, nakadawat sa  confidential information nga ang kargamento adunay sud nga smuggled rice.

Ang shipment gideklarar pa nga personal effects sa consignee nga usa ka Theresa Lawas nga giingong mulupyo sa  Barangay Pansoy, Sogod, Cebu.

Segun sa statement sa Adwana, ang mga sakop sa ESS misuway pagsusi sa Barangay Pansoy ug nasuta nga walay nagpuyo didto nga ginganlan og Theresa Lawas.

Tungod niini, si  Acting District Collector Charlito Martin Mendoza miluwat og PLCO o Pre-Lodgment Control Order batok sa kargamento niadtong Hulyo 29.

Gihimo usab ang sinto porsyento nga  physical examination  ni Customs Examiner Odilon Bustamante sinaksihan sa mga representante sa ESS, X-ray Inspection Project (XIP), Customs Intelligence & Investigation Service, Philippine Drug Enforcement Agency, Philippine Coast Guard ug Chamber of Customs Brokers, Inc. o CCBI-Cebu Chapter.

Ilang hidiskobrehan ang 495 ka sakong Myanmar White Rice, nga walay gihanig nga bisan unsang Sanitary ug Phytosanitary Clearance gikan sa Bureau of Plant Industry. (Jhon Tadlip/JTY) 

 

(Source: Bureau of Customs Cebu)

Related posts

Baguio Folk Told To Observe Social Media Ethics

RPN

More Medical Workforce Expected For Southern Philippines Medical Center, Private Hospitals In Davao City According To City Health Office

RPN

In The Island Of Siargao

RPN