Cebu City – Gitakdang ipakatap sa lungsod sa Consolacion, Cebu karong semanaha ang mokabat sa 20 ka sakop sa AFP o Armed Forces of the Philippines aron pag-abag sa mga polis sa hugot nga pagpatuman sa health protocols.
Sa nasayran, ang Consolacion, nga usa sa tulo ka LGUs o local government units nga adunay taas nga kaso sa  coronavirus disease o COVID-19, nagpabiling ubos sa GCQ o general community quarantine.
Sa news release nga gi-post sa lungsod, si Mayor Joannes Alegado mipahibawo nga iyang gisuwatan si Col. Jerry Borja sa AFP Cebu Task Force aron pagpangayo og augmentation force sa lungsod niadtong Agosto 5.
Sumala pa ni Alegado, iya kining gihimo dihang iyang namatikdan nga ang ubang mulupyo wala magtagad sa health protocols aron mapugngan ang pagkatap sa COVID-19.
Nakadawat usab siya og report bahin sa mga tawo nga nagpasiugda og tapok-tapok bisan sa pahimangno sa mga opisyal sa barangay.
Matod ni Alegado, motuman lang ang mga residente sa protocol kon naay presensiya sa mga polis apan mobalik na pod sa ilang gatherings kon wala nay polis.
Pero kon naa nay mga sundawo nga mouban pagbantay, nagtuo ang mayor nga seryoso nang motuman ang mga mulupyo sa guidelines ubos sa GCQ. Â (Jhon Tadlip/JTY)
(Source: Consolacion Public Information Office)