Cebu City – Pasul-obon na og face shields ang tanang manakay sa mga sakyanang de pasahero sugod sa Agosto 15.
Segun sa memorandum pinetsahan og Agosto 3, si Usec. Artemio Tuazon Jr. sa DOTr o Department of Transportation mimando sa tanan opisyal sa transport sectors pagpatuman sa maong regulasyon.
Ang pinugos nga pagpataod og face shields maisip nga dugang sa unang health protocols sama sa pagsuot og face masks ug pagtamod sa physical distancing.
Nag-ingon ang memo sa DOTr nga basi sa instruction sa secretary, gimandoan ang tanang opisyal ug lider sa pipila ka transport sector pagpasul-ob og face shields sa tanang pasahero sa mga dapit nga gitugot na ang pagbiyahe sa mga PUJ, bus ug ubang pasaheroan sugod sa Agosto 15.
Apan kadtong mag-agi sa kadagatan, gimandoan pagtaod og face shields sugod sa Agosto 7 o sa Biyernes.
Samtang sa laing memorandum, si Vice Admiral Narciso Vingson Jr., assistant secretary for Maritime, mimando sa Marina o Maritime Industry Authority, PPA o Philippine Ports Authority, CPA o Cebu Port Authority, ug PCG o Philippine Coast Guard pag-implementar sa “No-Face-Shield, No-Ride” policy sugod sa Biyernes. l via Jhon Tadlip/JTY
(Source: Department of Transportation & Maritime Industry Authority)