Cebu City – Ubos sa heightened alert ang tanang pantalan sa Sugbo sugod karong adlawa hangtod sa Abril 5, subay sa pagpatuman sa “Oplan Biyaheng Ayos: Semana Santa 2021”.
Suma pa sa general manager sa CPA o Cebu Port Authority, Leonilo Miole, hugot nga makiglambigit ang ports sa tanang katimbang nga mga ahensiya ug stakeholders alang sa kaluwasan, kahapsay, ug kahamugaway sa mga pasahero taliwa sa hulga sa COVID-19.
Nakigtagbo si Miole sa tanang port management officers, port security heads, representate sa maritime & enforcement partners, ug port stakeholders aron paghingpit sa preparasyon sa gipaabot nga paghugop sa mga sumasakay nga mamauli sa Semana Santa.
Subling gidasig ni Miole ang publiko nga motuman lang sa safety ug health protocols sa port premises sa tanang higayon.
Ang mga lumargahay nga mga pasahero, giawhag sa pagpakiglambigit sa ilang padulngang lokalidad o sa Philippine Coast Guard para sa travel requirements nga gikinahanglan sa dili pa sila moadto sa pantalan.
Matod ni Miole, adunay mga higayon nga ang mga pasahero magpa-book sa ilang ticket online bisag walay coordination sa receiving LGU, ug subo palandongon nga wa sila hatagi og clearance sa coast guard nga makasakay sa barko. (Jhon Tadlip/JTY)
(News & photo courtesy of Cebu Port Authority)