Cebu City- Nagmontar ang Cebu Port Authority kun CPA og temporaryong isolation room sa tanang pantalan sa lalawigan sa Sugbo alang niadtong mga pasahero nga magpakita og sintoma sa coronavirus disease kun Covid 19.
Sa giluwatang press statement, ang general manager sa CPA, Leonilo Miole, miingon nga usa kini sa ilang pamaagi pagpaminos sa risgo nga hitaptan sa virus.
Matod ni Miole, ang tanang ports gitahasan pagtan-aw sa temperatura sa matag pasahero nga mangabot ug iseguro nga adunay sabon ug hand sanitizer sa pansayan aron kapugngan ang posibleng pagkatap sa Covid 19.
Sa milabayng buwan, gimando sa Kapitolyo nga kadtong mga pasahero nga magpakita og timailhan sa virus sama sa ubo, sip-on ug hilanat, dili tugtang makasakay sa barko.
Nagkanayon si Miole nga ang CPA hugot nga makiglambigit sa nahitungdang mga ahensiya sama sa DOH kun Department of Health labot sa pagplastar og panagang batok sa Covid 19.
Gani, nag-request na sila sa DoH 7 pagpada og mga medical officer ug ambulansiya sa dunggoanan.
Giawhag usab ni Miole ang publiko nga makig-alayon sa ilang mga lakang ug mopaubos sa protocols aron mapanalipdan kini gikan sa coronavirus.