Cebu City – Milapas na sa 12 mil ang gidaghanon sa mga pasyente sa coronavirus sa Central Visayas nga naayo.
Segun sa report sa Department of Health o DOH 7, dugang 258 ang natalang recoveries sa rehiyon nga mas daghan pa sa bag-ong mga kaso nga 149.
Nunot niini, miabot na ang tanang naulian sa virus sa tunga-tungang Kabisay-an sa 12,196.
Samtang ang cumulative total sa kumpirmadong mga kaso mitungtong na sa 17,518 hangtod sa miaging adlaw.
Subay sa nagpadayong pagsaka sa mga nakarekober nga milabaw pa sa bag-ong mga hitaptan sa virus, ang ihap sa aktibong mga kaso mius-os usab.
Segun sa latest bulletin sa DOH 7 alas 5 sa milabayng hapon, miabot na og 4,308 ang active cases sa coronavirus.
Nasayran nga 71 porsyento sa aktibong mga kaso o 3,050 sa 4,308, ang ubos sa home isolation nga nagpasabot nga ang mga pasyente nagpakita og minos nga sintomas o wala gyoy timailhan sa sakit.
Samtang ang nahibiling 1,258 anaa pa sa tambalanan tungod sa grabeng mga sintoma sa impeksyon.
Kadaghanan sa aktibong mga kaso ania sa Cebu island nga gilangkoban sa mga siyudad sa Sugbo, Mandaue, Lapu-Lapu, ug Cebu province. (Jhon Tadlip/JTY)
(Source: Department of Health VII)