Cebu City – Milapas na sa 19 mil ang ihap sa mga gipang-covid sa Central Visayas tungod sa nadugang nga 120.
Sa case bulletin sa Department of Health o DOH 7, ang uwahing mga hitaptan naggikan sa probinsiya nga mitala og 70, lakip sa duha sa Talisay ug tulo sa Minglanilla; 20 sa Cebu City; napu sa Lapu-Lapu; unom sa Mandaue; siyam sa Negros Oriental; ug lima sa Bohol.
Nunot niini, miabot na ang tanang kaso sa virus sa rehiyon og 19,018 apan 2,324 lang ang aktibo.
Basi sa data sa DOH 7, labing daghan sa aktibong kaso ang probinsiya nga mitala og 889 ug kini mas daghan kon itandi sa Cebu City nga niadto maoy pirmeng mag-una.
Pagka karon, ang Cebu City nga aduna nay 9,634 ka kaso, 635 ray aktibo.
Sa nasayran, ang aktibong mga kaso sa Cebu City miabot na unta og 1,200 niadtong Agosto 20 apan midailos dihang gireport sa DOH-7 ang 621 ka pasyente nga naulian.
Si Dr. Mary Jean Loreche, tigpamaba sa DOH-7, miingon nga ang recoveries dili na mag-agad sa resulta sa swabbing.
Samtang ang aktibong mga kaso sa Cebu province naglakip sa ihap sa health department sa aktibong mga pasyente sa Talisay nga mitala og 56; Minglanilla, 39; ug Consolacion, 21. (Jhon Tadlip / JTY)
(Source: Department of Health VII)