Davao City— Hingpit na nga nakabalik sa ilang tagsa tagsa ka mga pinuy- anan ang dul an sa kapin Kwatro Mil ka mga tawo nga una nang namakwit gumikan sa Bagyong Chedeng nga nakaapekto sa Davao Region dili pa lamang dugay. Ang Office of Civil Defense (OCD)-Davao, nakatala sa kinatibuk-ang 4,103 ka mga internally displaced person (IDP), apan way natala nga bisan usa nga namatay nga indibiduwal sa nahisgutang Bagyo.
Bisan sa paglandfall sa bagyong Chedeng sa rehiyon, nagpabiling normal ang sitwasyon sa Dakbayan sa Davao ug sa pipila ka dapit sa rehiyon apan walay klase sa mga estudyante. Sa pakighinabi kang Ret. Supt. Alfredo Baloran, ang hepe sa City Disaster Risk Reduction and Management Council, nga subay sa ilang monitoring walay namatikdan nga mga pagdako sa tubig sa mga sapa sa siyudad ug walay nahitabo nga mga pagbaha.
Apan gilauman nga karong adlawa posibleng motaas ang tubig sa kasapaan sa Davao gumikan sa natigum nga tubig ulan gikan sa kabukiran. Hinoun dunay lima ka pamilya sa Quinones Compound, Barangay Matina Crossing ang pugos nga gipapahawa sa ilang lugar human makita nga miliki na ang bukid nga dunay posibilidad nga mo-landslide.
“Naa sila karon sa barangay hall sa Crossing Matina, ginaatiman sa atong mga barangay officials,” ingon ni Baloran.
Giingon nga pag-ulan lang ang gikiay ni Chedeng ug dili kaayo hangin sa pagtugdon niini sa yuta alas 2:30 sa kaadlawon, Martes. Suma sa weather bureau sa Philippine Atmospheric, Geophysical and Astronomical Services Administration (Pagasa), lauman nga Huwebes, Marso 21, makasinati og init nga kahimtang sa panahon ang tibuok rehiyon.
Sa pikas bahin, si Davao Oriental Governor Nelson Dayanghirang nag-order na sa tanang ahensya sa DavOr nga paspasan ang pag-ayo sa Masipit Bridge sa Tarragona town nga nadaut sa Chedeng.
