Nagkatigum bag-uhay lang ang pito (7) ka mayor sa probinsya sa Sarangani kuyog sila Governor Steve Chiongbian Solon ug PNP Sarangani Provincial Director Col. Michael Lebanan sulod sa Sarangani Capitol Gymnasium, aron pahugtan pa ang mga lakang batok sa pagtakdanay sa Coronavirus.
Nagpabilin man ang status nga MGCQ kon modified general community quarantine sa entiro probinsya sa Sarangani. Apan dili magkumpyansya tungod nibalik napud saka ang gidaghanon sa mga natakbuyan sa Rehiyon Dose.
Sa report sa Department of Health kagabii, adlaw nga Biyernes, Abril 30, anaa na sa 346 ang active cases sa South Cotabato, gisundan sa Gensan 147 active cases, 98 ang North Cotabato, 56 sa Sultan Kudarat, ug ulahi ang Sarangani Province nga adunay kwarentay uno (41 ) nga active cases.
Aduna nay 251 ang nangamatay sa Region 12 nga konektado sa COVID-19. Ang dakbayan sa Heneral Santos ang may nubenta (90) kabuok, 67 taga-North Cotabato, 56 gikan sa South Cotabato, 20 sa Sultan Kudarat, ug dise otso (18) sa Sarangani.
Nagpatuman na karon ang LGU Gensan og border restriction kung diin gitugutan lang makasulod kadtong adunay labing importanteng tuyo sa syudad. Mulungtad kini hangtud Mayo 31. Samtang, ang South Cotabato ang nagpatuman og GCQ o general community quarantine usa ka bulan gihapon karong Mayo.
Walay hunong ang pasidaan ni Governor Solon kauban sila Malungon Mayor Tessa Constantino, Glan Mayor Vivien Yap, Malapatan Mayor Jun Sumbo nga usa pud ka COVID-19 survivor, Alabel Mayor Nonoy Salarda, Maasim Mayor Zyrex Pacquiao, Kiamba Mayor Bogi Martinez ug Maitum Mayor Bryan Reganit, nga bisan pa man nabakunahan na, batasanon ug mas samot tumanon ang mga patakaran tungod nanggawas naman hinuon ang mga bag-ong variant sa Coronavirus.
Suot pirme dapat og face mask ug face shield, mag-disinfect sa mga kamot ug kalawasan, dos metros (2m) nga distansya sa katapad, humulan ang mga gipangsuot sa gawas ug maligo una musulod sa panimalay, ug dili usa mag-tapok tapok.
Patay na sila Claire dela Fuente ug Victor Wood, mga sikat nga mang-aawit sa Pilipinas, tungod sa COVID-19. Sa nasud India karon, dili na mahitsura ang sitwasyon gumikan ang ilang mga patay sa India ang gipangdauban na lang gamit ang mga kahoy sa gawas nga bahin tungod sa kadaghan.
Didto sa kauluhang Maynila, dili gihapon muubos sa walo ka libo (8K>) ka mga indibidwal ang nangaigo og Coronavirus matag adlaw. Sa Sarangani Province, segun ni Provincial Health Officer Dr. Arvin Alejandro, nagpatawag og coordination meeting si Governor Solon sa mga mayor ug sa labaw sa PNP Sarangani aron pahugtan pa ang mga palisiya, hilabi na ang padayong pagpatuman sa mga personal safety protocol, contact tracing, testing, isolation, pagtambal sa mga nag-positibo ug ang pagbakuna, sa pagsuporta kana nila Senador Manny ug Congressman Ruel Pacquiao, Vice Governor Elmer De Peralta ug tanang board member.
Dul-an lima ka libo (<5K) na ka mga indibidwal ang nabakunahan tibuok Sarangani Province, subay sa listahan ug alokasyon nga gihatag sa Department of Health. (Provincial Information Office – Sarangani)
