Agi’g suporta ug tabang sa kampanya nga masumpo ang pagkuyanap sa African Swine Fever (ASF) sa Cagayan de Oro, nagmugna bag-ohay lamang og kahugpongan ang mga lechonero ning syudad.
Ang bag-ong namugna nga United Lechoneros of Cagayan de Oro Association nga gipangulohan sa ilang presidente nga si Leo Eduria sa Fatzo Lechon mibisita gilayon ni Officer-in-Charge City Veterinarian Dr. Lucien Anthony Acac, ug ni Dr. Darryl Q. Rasay, head sa Meat Inspection Division sa City Veterinary Office.
Dugay na gipadayag sa syudad ubos sa administrasyon ni Mayor Oscar Moreno nga mahugpong ang mga lechonero aron masiguro nga aduna sila’y kahiusahan ug matabangan ang syudad sa kampanya nga luwas ug limpiyo ang tanang karne ug lechon nga ibaligya ug adunay kasigurohan ang mga mamalitay.
Sa panahon nga miigo ang ASF sa syudad, mas gihingusgan kini atol sa gipahigayon nga virtual meeting uban sa mga lechoneros, meat vendors ug backyard hog raisers sa tinguha nga magtinabangay ang maong mga sektor samtang dili pa magkulang ang supply sa mga baboy ilabina nga gilimitahan na sa supplier ang mga meat vendors ngadto sa isa na lamang ka hog matag adlaw.
Alayon niini, mapasalamaton ang syudad sa hugpong sa mga lechonero sa pagtubag sa hangyo ug naglaum nga pinaagi niini matabangan ang syudad sa kampanya batok ASF. (City Veterinary Office)