Taliwala sa giatubang karon nga pandemya, wala nagmakuli ang administrasyon ni Governor Roberto Uy sa paghatag ug pahalipay ug ayuda ngadto sa job order workers, contract of service workers, regular ug plantilla nga mga kawani sa kagamhanag probinsyal sa Zamboanga del Norte.
Kini human giaprubahan sa Sangguniang Panlalawigan ang Appropriation Ordinance nga giduso ni 3rd District Board Member Venus Uy atul sa ilang regular session kaniadtong Martes, Disyembre 1 alang na sa General Fund Supplemental Budget Number 5, niining tuig 2020 sa probinsya sa Zamboanga del Norte sa magamit nga pundo nga ₱ 48,000,000.00.
Matud pa ni Vice Governor Senen Angeles nga naglakip kini sa financial assistance alang sa job order workers ug Socio-Economic Relief Allowance/Assistance alang sa regular ug casual nga mga kawani.
Sa mensahe usab ni Governor Roberto Uy atul sa ambush interview, kini ang namahayag nga hingpit nilang gipangitaan ug paagi aron mahatagan sa ₱ 10,000 nga ayuda ang matag kawani sa probinsya.
Dugang pa ni Governor Uy nga ning panahon sa Pasko, angayan kita magmalipayon ug ingon man magpasalamat usab kita sa walay puas nga grasya, kalinaw ug gugma sa Diyos nga iyang gihatag kanato.
Giawhag lamang sa amahan sa probinsya ang katawhan nga kanunay magpasalamat kanunay sa Labaw’ng Makakagahum.
Sa Disyembre 1, mipagawas sa Executive Order Number 20-113 si Governor Uy nga mao ang “An Order Prescribing the implementing Guidelines Concerning the grant and release of Socio-Economic Relief Allowance/Assistance to regular and casual employees and donations/financial assistance to job order contractual workers, all of the Provincial Government of Zamboanga del Norte.”
Matud pa usab sa Order Ehekutibo sa gobernador nga bisan pa man sa giatubang nga hulga sa COVID-19, padayong nagtrabaho ang mga kawani sa probinsya aron lamang mahatud ang serbisyo sa katawhan ug mapatuman ang mga proyekto ug programa sa kagamhanang probinsyal. (Provincial Information Center-mbmontederamos)