Cebu City- Pormal nga gipahibawo ni Lapulapu City Mayor Junard Chan ang pagsuspenso sa mga kalihokan nga gihan-ay alang sa kasaulogan sa Kadaugan sa Mactan tungod sa hulga sa coronavirus disease kun Covid-19 pandemic.
Sumala pa ni Chan, tungod sa paglugway sa ECQ kun enhanced community quarantine sa Lapulapu hangtod sa Abril 28 imposibleng mapadayon o mahinayon ang ginabiing tulumanon nga gitakda untang magsugod duha ka semana sa dili pa ang adlaw sa okasyon sa Abril 27.
Sa iyang post sa Facebook, si Chan mipadayag nga ila na untang gipangandaman ug gihan-ay ang nagkadaiyang kalingawan alang sa paghandom sa pagkabayani ni Datu Lapulapu ug mga kauban batok sa mga manunulong, 499 ka tuig na ang nakalabay.
Gipadayag ni Chan nga nakasabot siya nga naghinam-hinam ang mga Oponganon sa tinuig nga kasaulogan pero mas gipalabi sa gobyerno ang ilang kahimsog ug kabaskog.
Alang niya, angayng magkahiusa ang tanan pagpakgang, pag-abog ug pagpatay sa makamatay nga virus nga padayong miatake sa liboan ka tawo sa Pilipinas ug ubang kanasuran.