Cagayan de Oro City – Dili pasudlon sa kapitolyo sa Misamis Oriental ang mga kawani niini nga dili magsul-ob sa faceshield. Mao kini ang direktiba ni Gobernador Bambi Emano aron mapanalipdan ang mga kawani batok sa COVID-19. Nasayran nga gitahasan si Provincial Administrator Atty. Joy Mateo sa pagmonitor sa mga mapasagarong empleyado aron manubag sa iyang pagsupak sa health protocols sa probinsya.
Sayo niini, gibutyag ni MisOr Task Force on Covid-19 Chief Dr. Jerie Calingasan nga lima ka lungsod na ang nasudlan sa local transmission diin ang pinakaulahi ang taga lungsod sa Talisayan.
Sa pikas bahin, obligahon usab ni City Mayor Oscar Moreno sa dakbayan sa Cagayan de Oro ang mga residente sa dakbayan pagsul-ob sa face-shields kon mogawas sa pinuy-anan ug mosulod sa mga balay-patigayon.
Nasayran sa gibutyag ni City Health Office Head Dra. Lorraine Nery nga mitala na sa 249 ang kaso sa bayrus sa syudad diin napuno ang napulo ka pasyente nga naglakip na sa duha ka local transmission sa barangay Gusa ug Kauswagan ning dakbayan.
(Provincial Information Office/ City Information Office)