Cebu City – Giangkon sa operator sa Ceres Bus Liner nga nagsugod na sila pagpaubos sa ilang mga drayber sa mandatory drug test agig sanong sa order sa Land Transportation Franchising & Regulatory Board o LTFRB-7.
Si Joelito Cabanes, admin manager sa VTI o Vallacar Transit Inc., mitug-an nga naka-test na sila og hangtod sa120 ka driver samtang susamang drug test usab ang gihimo gahapon.
Ang north-branch sa kompaniya adunay 300 ka driver.
Sa nasayran, si director Eduardo Montealto Jr.sa LTFRB 7 mimando sa bus company pagpa-drug test sa ilang north branch kansang mga drayber nalambigit sa sunod-sunod nga aksidente sa karsada nga mikalas og pipila ka kinabuhi.
Naglatid usab si Montealto og deadline sa pagduso sa resulta sa drug test sud sa 30 ka adlaw apan matod ni Cabanes, mahimo silang maka-submit sa resulta sulod lang sa unom ka adlaw.
Gawas sa drug testing, gitug-an ni Cabanes nga sukad sa miaging adlaw gipaubos nila sa seminar ang mga drayber labot sa defensive driving uban sa taga LTFRB-7.
Midugang si Cabanes nga aduna usab silay mga evaluators gikan sa ulohan nilang buhatan ug kini ang mo-assess sa performance sa ilang mga drayber atol sa driving tests.
(Jhon Tadlip/JTY, photo courtesy of Mandaue City – Provincial Information Office)
(Source: LTFRB 7)