Extended ug hangtud pa sunod tuig 2021 nga walay pagabayaran ang mga taga-Sarangani Province sa pagkuha sa ilang laboratoryo ug medical certificate sa tanang pampublikong tambalanan sa probinsya.
Gibutyag ni Ms. Eliza Cania, ang provincial treasurer, nga tungod sa paglugway ni Pangulong Rodrigo Duterte sa state of calamity sa tibuok Pilipinas hangtud Setyembre tuig 2021 pinaagi sa Proclamation No. 1021 gumikan sa Coronavirus pandemic, sunod tuig na usab sila sa Provincial Treasurer’s Office mangolekta sa maong public hospital fees.
Nakalatid matud pa sa mga resolusyon nga na-aprobahan niaging mga bulan sa Sangguniang Panlalawigan nila Board Member Joseph Calanao, Board Member Irish Arnado, Vice Governor Elmer De Peralta ug mga kaubanang board member, sa kamanduan ni Governor Steve Chiongbian Solon ug sa pagsuporta nila Senador Manny ug Congressman Ruel Pacquiao, nga hangtud dili pa mawala ang state of calamity, suspendido sa gihapon nga ipatuman ang porsyon sa Provincial Tax Ordinance.
Adunay lima (5) ka municipal hospital ang Sarangani ilalum sa superbisyon sa Provincial Government sa Sarangani, lakip na ang Sarangani Provincial Hospital. Level I hospital na ang mga municipal hospital sa Kiamba ug Glan, samtang ang Malungon municipal hospital ang gapaningkamot usab nga mahimong Level I.
Gituyo kini nga lakang aron dasigon ang mga lumulupyo nga dili mag-alanganin sa pagduol sa ilang public hospital kung adunay gibati sa kalawasan, hilabi na kung makasinati og sintomas sa flu aron paspas matabangan. Sayod naman ang tanan nga musamot ka-lala ang sitwasyon sa hisgutanang COVID-19 kung may sakit ng daan ang pasyente, sama sa asthma, kidney failure, heart problem ug diabetes. Sa tibuok Region 12, anaa na sa kwarentay nuybe (49) kabuok indibidwal ang namatay nga konektado sa COVID-19. (Provincial Information Office – Sarangani)