Cagayan de Oro – Mokabat 450 ka aplikante sa housing program sa syudad ubos sa administrasyon ni Mayor Rolando `Klarex’ Uy ang mitambong sa Community Needs Assessment adlaw’ng Sabado Okt. 19, 2024.
Ang kalihokan gipasiugdahan sa City Housing and Urban Development Department (CHUDD) uban sa kadagkuan sa Socialized Housing Finance Corporation (SHFC) ug kini gitambongan nila ni Mayor Klarex ug Barangay Carmen Punong Barangay Raineir Joaquin “Kikang” Uy.
Ang mga aplikante nga nitambong gikan sa Barangays Carmen, San Simon, Pagatpat, ug pipila ka barangay sa Distrito I.
Si CHUDD acting Department Manager Cesar A. Pagapula-an, Jr., mipasabot nga gipailawom usab sa orientation ug interview ang mga aplikante aron makumpleto ang ilang mga requirements ug makasugod na sa pagproseso.
Kanunay gipahinundum ni Mayor Klarex ngadto sa mga aplikante nga gipaningkamutan sa gobiyerno nga maatiman ang katawhan nga walay panimalay ilabina ang mga informal settler families (ISFs) aron mahatagan og disenteng pinuy-anan.
Apan gipasabot usab nga dili na libre ang balay nga ilang ma-avail ug maangkon nila kini pinaagi sa tabang sa SHFC pero sa barato nga presyo.
Alayon niini, gipasalamatan ni Mayor Klarex ang kadagkuan sa SHFC ug uban pa nga national agency ilabina ang Pambansang Pabahay Para sa Pilipino (4PH) program ni Presidenti Ferdinand “Bongbong” Marcos Jr.