Dako ang pagpasalamat ni Mayor Jan Hendrik Vallecer sa Philippine Fiber Development Administration Authority kun PhilFIDA tungod sa na-invest niining mga proyektong pang – Livelihood Program para sa mga mag-uuma didto sa ilang lungsod sa Roxas, Zamboanga del Norte.
Usa na niini ang Abaca Planting nga sumala pa ni Mayor Vallecer nga libo-libong seedlings sa abaca ang gihatag sa PhilFIDA sa ilang lungsod para sa mga mag-uuma.
Busa nagpasalamat ang mayor sa Department of Agriculture pinaagi sa PhilFIDA nga nahatagan ang ilang mga mag-uuma og mga produkto dili lamang mga seedlings sa abaca kundili apil na ang mga equipments ug mga trainings sa mga mag-uuma para labi nilang mahibaw-an ang mga pamaagi sa pag-atiman sa nahisgutang abaca planting para labing molambo ug magmalampuson.
Sumala pa sa mayor nga ang PhilFIDA nag-organize usab og Farm School para sa abaca sa Roxas nga sobra sa singkuwenta ka mga estudyante ang nakagusto niini ug daghan ang ilang natanom.
Nagalaom si Mayor Vallecer nga ang lungsod sa Roxas labi pa unyang molambo tungod sa pagtinabangay sa lokal nga kagamhanan sa Roxas, Department of Agriculture, PhilFIDA ug sa mga Indigenous People kun IP Association nga na-organize sa lungsod sa Roxas.
Busa nanawagan ang mayor sa tanang mga mag-uuma sa lungsod sa Roxas nga naningkamot sa pagtanom aron makab-ot ang kalampusan nga dili lamang magduha-duha sa pagpangayo og tabang sa lokal nga kagamhanan sa Roxas tungud kay sila nakaandam nga motabang ug mosuporta para sa kaayuhan ug kalampusan sa tanan. (Rosevelt D. Mondinido, Volunteer RPN DXKD Dipolog)