Mipagawas sila si Mayor Darel Dexter T. Uy ug Bise-Mayor Senen O. Angeles sa ilang pamahayag kabahin na sa nahitabong pagpanumbag dinha sa Dipolog Boulevard karong bag-ohay pa lamang nga nag-viral sa social media.
Sumala ni Mayor Uy, sa pagkahibalo niya sa nasangpit nga panghitabo, diha-diha dayon nga gipapangita ang duha ka mga suspek diin usa niini ang nasayrang minor-de-edad samtang ang usa ang nagpangidaron og 19 anyos. Gikumpirmar sa mayor nga nadakpan ang maong mga suspetsado ug karon anaa na sa kustodiya sa kapolisan ning dakbayan.
Dugang niya nga sa pagka-karon padayon pa ang gihimong imbestigasyon lakip na ang pagkuha og insaktong impormasyon aron mapasakaan og tukmang kaso ang 19 anyos nga suspek. Gipamahayag usab niiini nga ang siyudad motabang ug makigtambayayong sa kapolisan aron mapahamtang ang tukmang silot alang niadtong mga milapas sa balaod aron magpabilin ang kahapsay ug kalinaw ning dakbyan.
Sa laing bahin, gibutyag ni Bise-Mayor Angeles nga kining nasangpit nga sitwasyon mitumaw nga nagsugod sa mga tulonghaan ning dakbayan diin kining mga paregla-paregla sa mga “gang” nahimong dakong suliran ug karon nahitabo na gayod sa Dipolog Boulevard.
Matod pa sa Bise-Mayor, kini natuki na sa konseho ug sa kasamtangan, gipaningkamotan na nga mapanday ang ordinansa alang ning maong katuyoan aron ma-protektahan ang katawhan nga magsuroy-suroy sa mga kadalanan ug uban pang pampubliko nga lugar ning siyudad.
Kahinumdoman nga nahugyaw ang katawhan sa dihang na-post sa social media ang usa ka video diin dunay duha ka mga lalaki ang kalit lamang nanumbag sa duha usab ka lalaki nga naglingkod sa “bench” dinha sa Dipolog Boulevard karong bag-o pa lamang.
(Source: Dipolog City Government Facebook page)