Dako ang gihimong pagpasalamat ni MANUWASA o Mayo Nueve Water Works Association President Jocelyn “bebe” Ebrona sa gihimong pag bisita niadtong nakalabayng adlaw sa ilahang buhatan ni City Mayor Ronel C. Rivera. Kini human sa pagka kompleto sa dugang water pump project nga gipondohan sa lokal nga panggamhanan ug sa pakig alayon sa usa ka NGO nga USAID nga naglayong mohatag ug mga proyektong may kalabutan sa patubig sa tibouk syudad.
Sumala pa sa mayor nga nakita niini nga kakulangon sa maong pasilidad hinungdan nga gi aprobahan niini ang request sa mga opisyales sa patubigan. Gihangyo usab niini ang mga opisyales sa Rural water works Association nga ayohon ang pag dumala sa mga patubigan aron malikayan ang problema nga nahitabo sukad niadtong konsehal pa si Mayor Rivera.
Kahinumduman nga sagad sa maong problema ang naglambigit sa problema sa cash flow handling hinungdan nga maputlan na lamang ug kuryente kay wala maka bayad ang maong patubigan. Sa kasamtangan giklaro sa mayor nga wala nay problemang naga kahitabo nga sama niini kay ila na matud pang na tudloan ug na regulate ang tanang RWSA’s sa syudad alang sa mas kasaligan nga pag padagan sa ilang nagkadaiyang patubigan sa ilang nagkalain laing purok. (OIC Cris Legaspi, RPN DXDX GenSan)
