Cebu City – Giisip ni Cebu City Mayor Edgar Labella nga usa ka dakong kalamposan sa Sugbo ang gi anunsyo sa Department of Health nga padung na ang Dakbayan sa pag flatten sa curve.
Gibutyag sa DOH nga ang daily average sa Covid-19 nga mga kaso anaa lang sa 23, gikan sa Agosto 1-19.
Niadtong Agosto 17 duna lay pito ka mga bag-ong kaso ug walo pagka Agosto 19.
Alang ni Labella nga nagpamatud kini nga mahimo ra gyud nga gamhan ang maong sakit kung musunod sa mga heath protocols nga napamatud-an nga epektibo batok sa maong virus.
Mapasalamaton ang mayor sa mga lumulupyo sa syudad nga padayong musunod sa mandatory stay-at-home order ug pagsiguro sa pagsul-ob og mask, pagsubay og physical distancing.
Lakip na ang kanunay nga paghugas sa kamot kung mogawas man gani.
Dako sab ang pagdayeg sa mayor ngadto sa mga frontliners sa padayong pagbuhat kotob sa ilang mahimo aron maluwas ang ang katawhan batok sa pandemya.
Panawagan niini sa tanan nga padayong magbinantayon bisan anaa na sa General Community Quarantine, kay matod niya, wala pa kini nagpasabot nga nawala na ang coronavirus. (Jhon Tadlip)
(Source: Cebu City Public Information Office)