Cagayan de Oro – HUGOT nga mipakita sa iyang suporta si Mayor Klarex Uy alang sa 400 ka scholars-leaders kinsa misalmot sa BUGSAY 2.0 Iskolar sa Dakbayan Leaders Congress, Agosto 16, diha sa City Tourism Hall, ning siyudad.
Saysay pa ni Mayor Klarex nga siya mismo ang misugyot nga nganlan kini og bugsay tungod kay ang bugsay nagpasabot sa panaghiusa.
“Mahinungdanon kaayo sa usa ka sakayan nga naa’y bugsay. Kaning bugsay, aduna’y panaghiusa… kusog nga pagbusay aron dali ug sayon moabot sa atong padulngan nga maghiusa ang pagbusay. Kay kon magbugsay ang usa padulong didto, unya ang uban mobugsay padulong dinhi, dili ta moabot sa atong padulngan,” saysay pa sa mayor.
Ang kalihokan gipasiugdahan sa City Scholarships Office (CSO) ubos sa pagpangulo ni Ms. Richel Petalcurin-Dahay.
Misaksi usab sa kalihukan si City Mayor’s Office consultant Jordan Apat ug City Councilor Suzette Magtajas-Daba, ang chairperson sa Committee on Education, diin nanumpa sa iyang atubangan ang mga community-based officers.
Ang BUGSAY 2.0 Iskolar sa Dakbayan Leaders Congress usa ka tinuig nga panagtapok sa mga scholars-leaders gikan sa mga partner schools ug community-based organizations.
Written by Cheleste Simene
Photo by CIO