Cagayan de Oro – Mainitong gipahalipayan ni Mayor Klarex Uy ang Kagayanong boksidor nga si Carlo Paalam human nakasulod sa 2024 Paris Olympics.
Matud ni Mayor Klarex nga dakong garbo ug dungog sa Cagayan de Oro ang talagsaong kalampusan nga nakab-ot ni Paalam.
Kini human iyang gidominar ang kaatbang nga si Sachin Siwach sa India pinaagi sa unanimous decision, 5-0, sa ilang away sa 57kg semifinals sa 2nd World Boxing Olympic Qualification Tournament sa Hua Mak Indoor Stadium sa Bangkok, Thailand.
Si Paalam, ang Tokyo Olympics boxing silver medalist, mao ang ika-katorse nga Pinoy athlete nga modula sa Paris Olympics.
Siya usab ang ikaupat nga boksidor sa nasud nga morepresentar sa nasud Pilipinas sa maong prestihiyosong kompetisyon sa kalibotan, kauban sila si Tokyo silver medalist Nesthy Petecio, Tokyo bronze medalist Eumir Marcial, ug first-time Olympian Aira Villegas.
News and photo by Cheleste Simene