Cagayan de Oro – DAKO ang pasalamat ni Mayor Rolando “Klarex” Uy sa malampuso’ng pagpahigayon sa final national evaluation alang sa ‘Seal of Good Local Governance’ kon SGLG sa syudad sa Cagayan de Oro adlaw’ng Huwebes, Oktubre 5, 2023.
Gani man, dako ang garbo ug kalipay ni Mayor Klarex sa pagtinabangay sa nagkalain-laing departamento sa city hall sa pagpangandam ug pagdawat sa national validation team nga gipangulohan ni SOCKSARGEN DILG Regional Director Josephine C. Leysa, kauban sila si Augustus Tabugo, Outcome Manager gikan sa DILG Cotabato Province; Crysanthea Zorilla, SGLG Focal Person gikan sa DILG South Cotabato; ug Mary Evlyn Abdilah, DRR CCA Focal Person gikan sa DILG Region XII.
Matud usab ni Ms. Shiela Lumbatan, City Mayor’s Chief of Staff, nga gikalipay niini ingon man sa mayor ang positibong rekomendasyon sa validation team sa SGLG council alang sa Cagayan de Oro tungod na usab sa paningkamot sa tibuok bureaucracy ubos sa administrasyon ni Mayor Klarex Uy.
Kini mao ang pinakaunang higayon sa Cagayan de Oro nga miabot sa national level sa hisgotanan sa SGLG requirements ug achievements sulod sa taas na nga katuigan.
Ang SGLG usa ka award, incentive ug recognition-based program alang sa tanang local government units tungod sa malambuong pagdumala sa kasihag o transparency ingon man accountability sa paggamit sa pundo sa gobyerno.
Written by Cheleste Simene
Photo by Reynan Baylin of CIO CDO