Cagayan de Oro – Dako ang pasalamat sa mga mag-uuma sa Barangay Cugman ug Tagpangi uban sa ilang pamilya ngadto sa syudad ilabina sa administrasyon ni Mayor Rolando `Klarex’ Uy sa irrigation project nga ilang nadawat alang sa ilang kaumahan pinaagi sa Agricultural Productivity Operations Office (APOO).
Gibutyag ni APOO Dep’t Head Paterno Gonzales nga nakadawat og upat ka rolyo sa HDPE pipes ang Lower Malasag Farmers Association (FA) sa Barangay Cugman pinangulohan ni Perlito Callora.
Samtang, laing unom ka rolyo sa HDPE pipes ang nadawag usab ni Dirio Cobayan nga mag-uuma sa Barangay Tagpangi alang sa iyang yuta nga wala na matamni gumikan kay walay insakto nga panubig.
Nasayran nga mga utanon ang ilang gipangtanom kaniadto apan naundang tungod sa kakulangon sa panubig apan tungod sa tabang sa syudad pinaagi sa APOO subli na nila kining matamnan.
Kini nga lakang sa syudad ang gikalipay sa mga mag-uuma ug mipaabot sa ilang dakong pagpasalamat kang Mayor Klarex nga gitubag ang ilang hangyo.
Ang agrikultura maoy usa sa mga priority program ni Mayor Klarex ilawom sa iyang RISE Agenda.
News and photo courtesy of CIO CDO