Cagayan de Oro – MALAUMON ang kagamhanang lokal ubos sa administrasyon ni Mayor Rolando “Klarex” Uy nga mahatagan na usab og kahigayonan ang syudad sa prestihiyosing Seal of Good Local Governance (SGLG) award human nga nasakmit niini sa unang higayon ang maong pasidungog sa milabay’ng tuig.
Sa mensahe ni City Administrator Atty Hilario Roy Raagas nga mirepresentar ni Mayor Klarex atol sa sinemanang pagpakayab sa nasudnong bandila adlaw’ng Lunes, iyang gipasabot nga mahibaloan sa syudad ang resulta sa gihimong assessment sa SGLG team sa mga departamento sa city hall karong Agosto o Septiyembre ning tuig
Nasayran nga bag-ohay lamang gipahigayon sa DILG regional office sa pagpangulo ni Asst Regional Director Yvete Tolentino-Sunga ang SGLG assessment sa City Tourism Hall.
Matud ni Sunga nga ang kadaogan sa Cagayan de Oro sa Seal of Good Local Governance (SGLG) sa milabay’ng tuig nagsilbing ebidensiya sa taas nga kalidad sa serbisyo nga gihatag sa lokal nga kagamhanan sa publiko.
Samtang gipasalamatan usab ni Mayor Klarex ang mga kawani sa city hall sa paningkamot nga mahatag ang tinuoray nga serbisyo sa katawhan. Apan gihagit usab sa mayor ang matag departamento nga palapdan pa ang ilang pag-alagad sa mga modangop sa syudad.
News and photo courtesy of CIO CDO