Gipasalig ni City Mayor Rolando ‘Klarex’ Uy nga ipadayon sa iyang administrasyon ang Barangay Empowerment Program diin iyang hatagan sa katungod ang mga kapitanes nga nagpasilong sa iyang administrasyon nga maoy mopili ug mopatuman sa mga proyekto sa ilang tagsa-tagsa ka barangay.
Kini ang gipadayag ni Mayor Klarex human nanumpa sa ilang katungdanan atubangan sa mayor ang 47 ka mga bag-ong napili nga kapitan, 47 ka Sangguniang Kabataan chairmen ug gatosan ka mga barangay kagawad gikan sa nagkadaiyang barangay sa Cagayan de Oro atol sa mass oathtaking nga gipahigayon Martes sa hapon, Nobyembre 7.
Matud pa sa mayor nga tuyo sa Barangay Empowerment Program nga mahatagan sa kagahum ang mga opisyales sa barangay sa pagpili sa ilang mga proyekto, sanglit sila ang mas nasayud sa mga proyekto nga haum gayud sa panginahanglanon sa ilang mga katawhan.
Nasayran nga dili momenos sa P10 milyones nga balor sa mga proyekto ang ibubo ni Mayor Klarex ngadto sa mga barangay sa Cagayan de Oro nga nagsuporta sa iyang RISE development agenda.
News and photo courtesy of CIO CDO