Cagayan de Oro – Gibuksan na sa publiko ang Marian Exhibit sa nagpadayong SAULOG Art Exhibition sa may City Museum and Heritage Studies Center alayon sa kasaulogan sa National Arts Month nga nagpakita sa nagkalain-laing Marian image nga ubra ni kanhi local artist nga si Pennesencio “Nonoy” Estarte.
Ang nasangpit nga Marian Exhibition maoy dugang art collection sa nauna nang gibuksan nga art exhibit sa nakalabay’ng bulan sa Pebrero nga mga ubra usab ni Nonoy Estarte.
Atol sa maong pagbukas, gikalipay nila ni Archbishop emeritus Antonio Ladesma ug ni Archbishop Jose Cabantan ang maong programa sa dakbayan, ilabina nga natunong usab kini sa pagsugod sa Semana Santa.
Sa kabahin usab ni City Administrator Atty Roy Hilario Raagas, kinsa mirepresentar ni Mayor Rolando Klarex Uy, ang nasangpit nga mga ubra ni Nonoy Estarte sa imahe sa Birheng Maria ang nagpakita usab sa dakung debosyon sa mga Kagay-anon, ilabina sa Berhin sa Cotta.
Gikalipay usab niini ang pagpahulam sa archdiocese sa maong ubra aron mapakita kini sa publiko.
Ang SAULOG Art Exhibit gipaluyohan sa lokal nga kagamhanan sa dakbayan sa Cagayan de Oro, Department of Trade and Industry (DTI), ug Kagay-an Misamis (KaMi) Creative Council.
Nasayran gikan ni Oro-TIPC head John W. Asuncion, ang overseer sa City Museum and Heritage Studies Center, nga bukas ang maong art exhibit hangtud Abril 30 ning tuig.
News and photo courtesy of CIO CDO